حد يطلب لنا البوليس

محل فى شارعنا بيتفتحوه جديد و الدى جى عالِ و الكل بيزيط بيوزعوا حاجات ببلاش و بيرقصوا و يعلوا صوتهم و ما اقولكش على الطبله و الزغاريد. ابن البواب جاى يشتم ف أمه من بعيد و ماسك ف خناق أبوه و عليه العوض ف أخواته هريدى و الواد سعيد. الاولانى هرب مش عارفين راح فين والتانى ف المشتشفى بيتعالج من ضرب أخوه اخر مره ليه. و الاب ف العماره إياها بيجعر و الام بتدعى على عيالها بس مش بصوت ..بصريخ ،و العيال لازم تصوت من اللى بيتعمل فيهم و الواد الكبير دماغ بيلعن ف كل حاجه ادامه على عكس اخواته الصغيرين ملوش ف الجرى و لا ف التنطيط. و بقية العيله بتتكلم بينهم و بين بعض بس الجيران اللى قصادهم متابعاهم من بعيد معذورين ماهما فتحوا الشباك على صراخ و زعيق. و دى لعنه الدوشه .. اليوم العادى زى يوم العيد . و اهى ايام مليانه بزمامير و طراطير و بلالين و الكل عايش سواء سعيد او مش سعيد . يااا جماعه حد يطلب لنا الشرطه ..حد يطلب لنا البوليس.. اهى اى حاجه تخلصنا من المورستان ده و التربتيت.